Lansiwyd cyfres o weithdai diogelwch bwyd ar gyfer gweithgynhyrchwyr bwyd a diod Cymru diolch i gyllid gan Raglen HELIX Llywodraeth Cymru.
Cynhelir y gyfres o weithdai rhwng mis Mehefin a mis Medi yng Nghanolfan Diwydiant Bwyd ZERO2FIVE ym Mhrifysgol Metropolitan Caerdydd, a bydd yn edrych ar bynciau diogelwch bwyd allweddol ar gyfer gweithwyr proffesiynol technegol.
Fel aelodau hanfodol o’r gadwyn gyflenwi, mae gan weithgynhyrchwyr bwyd a diod rôl bwysig i’w chwarae mewn diogelwch bwyd drwy sicrhau bod deunyddiau crai a chynhyrchion ar gael yn barhaus i’r boblogaeth ehangach.
Bydd y gweithdai’n ymdrin â’r pynciau canlynol:
- Manylebau – 17 Mehefin 2025
- Asesiad Risg Deunyddiau Crai, Profi a Rheoli Cyflenwyr – 1 Gorffennaf 2025
- Amddiffyn Bwyd – 8 Gorffennaf 2025
- Asesiad Bregusrwydd a Sganio’r Gorwel – 17 Gorffennaf 2025
- Rheoli Digwyddiadau – 4 Medi 2025
- Dadansoddiad o Wraidd y Broblem – 16 Medi 2025
Yn dibynnu ar faint y cwmni a’i gymhwysedd, gellir ariannu mynychu’r gweithdai hyn yn rhannol neu’n llawn. Er bod y gweithdai’n ffurfio cyfres, gall cynrychiolwyr fynychu gweithdai unigol i weddu i’w hanghenion busnes.
Wrth siarad am y digwyddiadau hyfforddi, dywedodd yr Athro David Lloyd, Cyfarwyddwr ZERO2FIVE:
“Ar adeg pan fo diogelwch bwyd byd-eang o’r pwys mwyaf, mae gweithgynhyrchwyr bwyd yn gyfrifol am sicrhau bod deunyddiau crai a chynhyrchion yn parhau i fod ar gael, yn fforddiadwy ac yn ddiogel. Ystyriaeth allweddol i unrhyw weithiwr proffesiynol technegol bwyd a diod, bydd ein cyfres o weithdai yn ymdrin ag amrywiaeth o bynciau pwysig.
“Mae’r digwyddiadau hyn yn rhan o ystod ehangach o gymorth diogelwch bwyd a ariennir y gallwn ei gynnig i weithgynhyrchwyr bwyd a diod drwy Raglen HELIX Llywodraeth Cymru. I gael gwybod mwy am y gefnogaeth y gallwn ei chynnig, byddem yn eich annog i gysylltu â ni.”
Mae Rhaglen HELIX yn cael ei chyflwyno gan bedwar sefydliad ledled Cymru ac mae’n darparu ystod o gymorth technegol ac arloesi wedi’i ariannu i gwmnïau bwyd a diod yng Nghymru.
I gael rhagor o wybodaeth am y gweithdai ac i gofrestru, ewch i:
https://zero2five.org.uk/training-events/
