Mae Simon Burns wedi’i benodi’n Gyfarwyddwr Technegol Canolfan y Diwydiant Bwyd ZERO2FIVE ym Mhrifysgol Metropolitan Caerdydd a bydd yn olynu Helen Taylor ar ôl iddi ymddeol ddiwedd Awst 2026.
Mae Simon yn dod â mwy na 27 mlynedd o brofiad technegol ar draws ystod eang o gategorïau bwyd. Ers ymuno â ZERO2FIVE yn 2022, mae Simon wedi rheoli cyfleusterau peilot y Ganolfan ac wedi darparu cymorth technegol a gweithredol i nifer o fusnesau bwyd a diod yng Nghymru. Mae ei feysydd arbenigol yn cynnwys systemau ansawdd a diogelwch bwyd, gyda ffocws penodol ar ddylunio ffatri ac offer hylendid.
Ochr yn ochr â’i rôl yn ZERO2FIVE, mae Simon yn gyfrannwr gweithgar i’r diwydiant bwyd trwy ei ymwneud â sawl corff proffesiynol. Mae’n gwasanaethu fel Cyd-gadeirydd pwyllgor y DU o’r Grŵp Peirianneg a Dylunio Hylendid Ewropeaidd (EHEDG), mae’n aelod o bwyllgor Cangen Cymru y Sefydliad Gwyddor a Thechnoleg Bwyd (IFST) ac mae’n Swyddog Cyswllt Myfyrwyr ac yn aelod o bwyllgor Cymdeithas Diogelu Bwyd y Deyrnas Unedig (UKAFP).
Mae Simon yn olynu Helen Taylor, sydd wedi gwasanaethu fel Cyfarwyddwr Technegol ZERO2FIVE ers 2016 ac sydd wedi bod yn rhan o dîm technegol y Ganolfan ers dros 20 mlynedd. Yn ystod ei deiliadaeth mae Helen wedi arwain tîm technegol ZERO2FIVE i gefnogi busnesau bwyd a diod Cymru ar draws pob categori cynnyrch, gan helpu’r sector i ddatblygu a chynhyrchu cynhyrchion sy’n ddiogel, yn gyfreithlon ac yn ddilys.
Mae Helen yn ffigwr uchel ei pharch yn y diwydiant bwyd a diod, gan wasanaethu fel Cadeirydd Cangen Cymru IFST, fel Cadeirydd Cyngor Cysylltiedig (2025-26) Bwrdd Gweithredol y Gymdeithas Ryngwladol ar gyfer Diogelu Bwyd (IAFP), ac fel aelod o Bwyllgor Cynghori Bwyd Cymru yr Asiantaeth Safonau Bwyd a Phwyllgor Cynghori Technegol SALSA.
Wrth siarad am y penodiad, dywedodd Peter Sykes, Pennaeth Canolfan y Diwydiant Bwyd ZERO2FIVE:
“Mae Simon wedi gwneud cyfraniad sylweddol i ZERO2FIVE ers ymuno â’r tîm yn 2022, gan gefnogi busnesau bwyd a diod ledled Cymru wrth helpu i ddatblygu ein cyfleusterau peilot arbenigol. Mae ei brofiad helaeth yn y diwydiant a’i ymrwymiad i hyrwyddo ansawdd a diogelwch bwyd yn ei wneud mewn sefyllfa dda i arwain ein tîm technegol.
“Hoffwn hefyd ddiolch i Helen am ei chyfraniad eithriadol i ZERO2FIVE dros fwy na dau ddegawd. Mae ei harweinyddiaeth, ei gwybodaeth dechnegol a’i hymroddiad wedi chwarae rhan bwysig wrth gefnogi twf a llwyddiant busnesau bwyd a diod ledled Cymru a thu hwnt.”
Wrth siarad am ei benodiad, dywedodd Simon Burns:
“Rwy’n falch iawn o gael fy mhenodi’n Gyfarwyddwr Technegol yn ZERO2FIVE. Ar ôl gweithio’n agos gyda busnesau bwyd a diod trwy gydol fy amser yn y Ganolfan, rwyf wedi gweld gwerth y gefnogaeth rydyn ni’n ei ddarparu.
“Edrychaf ymlaen at adeiladu ar y sylfeini cadarn a sefydlwyd gan Helen, a pharhau i helpu busnesau i ddatblygu cynhyrchion diogel o ansawdd uchel wrth gefnogi arloesedd a thwf ar draws y sector.”
