Stori llwyddiant: Trealy Farm Charcuterie
Cefndir
Wedi’i sefydlu yn 2004, mae Trealy Farm Charcuterie, sydd wedi’i leoli yn Sir Fynwy, yn cynhyrchu charcuterie crefftus arobryn gan ddefnyddio dulliau traddodiadol a’r cynhwysion o’r ansawdd gorau. Mae’r cwmni’n cynhyrchu ystod o dros ddeugain o gynhyrchion gwahanol gan gynnwys salami a chorizo yn ogystal â chigoedd wedi’u sychu yn yr awyr agored, eu halltu a’u coginio.
Mae Trealy Farm Charcuterie yn cyflenwi eu cynnyrch i fusnesau ledled y DU; o fwytai, cadwyni, delis, pizzerias a thafarndai, i westai, siopau fferm ac arlwywyr. Maent hefyd yn gwerthu eu cynnyrch yn uniongyrchol i gwsmeriaid trwy eu gwefan.
Cefnogaeth gan ZERO2FIVE
Mae gan Trealy Farm Charcuterie hanes hir o weithio gyda Chanolfan Diwydiant Bwyd ZERO2FIVE, gyda’r cwmni’n derbyn cefnogaeth barhaus i gynnal eu hardystiad diogelwch bwyd SALSA.
Pan ymunodd rheolwr technegol newydd â Trealy Farm Charcuterie ym mis Chwefror 2026, cynhaliodd technolegydd ZERO2FIVE sesiynau mentora un-i-un i’w ddiweddaru â system rheoli diogelwch bwyd y cwmni. Roedd y pynciau yn cynnwys cymeradwyo cyflenwyr, meysydd i’w gwella a nodwyd yn ystod archwiliad SALSA blaenorol Trealy Farm Charcuterie ac olrheiniadwyedd.
Wrth baratoi ar gyfer archwiliad SALSA Trealy Farm Charcuterie, cynhaliodd ZERO2FIVE archwiliad mewnol ac asesiad diagnostig o system rheoli diogelwch bwyd y cwmni ar y safle, gan nodi cydymffurfiaeth â’r safon a meysydd i’w gwella. O ganlyniad, cynhaliwyd sesiynau mentora pellach i’w helpu gydag unrhyw ddiweddariadau angenrheidiol i adeiladu system gadarn, ymarferol a chynaliadwy sy’n addas ar gyfer y dyfodol.
Manteision y gefnogaeth
Arweiniodd rheolwr technegol newydd Trealy Farm Charcuterie y cwmni’n llwyddiannus trwy eu harchwiliad SALSA diweddaraf ym mis Chwefror 2026. Mae cynnal ardystiad SALSA yn hanfodol er mwyn galluogi’r cwmni i barhau i gyflenwi eu cwsmeriaid presennol.
Mae ZERO2FIVE eisoes yn cefnogi Trealy Farm Charcuterie gydag adolygiad pellach o’u systemau rheoli diogelwch bwyd a bydd yn darparu mentora ar y safle ar gyfer unrhyw welliannau a argymhellir yn unol â rhifyn newydd Safon SALSA.
Dywedodd James Swift, Rheolwr Gyfarwyddwr, Trealy Farm Charcuterie: “Mae’r gefnogaeth gan ZERO2FIVE wedi bod yn amhrisiadwy wrth fentora ac uwchsgilio’r tîm technegol a’n tîm ehangach. Mae hyn yn ein galluogi i barhau i gynhyrchu cynhyrchion diogel ac o ansawdd uchel.”
Cysylltwch â ni
Os hoffech gael gwybod mwy am sut y gallwn helpu eich busnes neu os oes gennych unrhyw gwestiynau am y cymorth y gallwn ei gynnig, yna cysylltwch â ni.
