Mae cwmni newydd piclo gourmet yn Nhorfaen ar waith mewn pryd ar gyfer tymor prysur y Nadolig diolch i gefnogaeth rhaglen a ariennir gan Lywodraeth Cymru.
Mae Picklebits, gan Will York, yn masnachu mewn marchnadoedd Nadolig ledled de Cymru y gaeaf hwn yn dilyn cefnogaeth dechnegol gan y Rhaglen HELIX.
Ar ôl teithio ledled y byd gyda bag cefn, dechreuodd Will y cwmni Packed, busnes bwyd stryd sy’n gwerthu brechdanau cig eidion Eidalaidd arddull Chicago, yn 2024. Ar ôl cystadlu yn rowndiau terfynol Gwobrau Bwydydd Stryd Cymru a derbyn adborth disglair gan gwsmeriaid am y piclau a ddefnyddiodd yn ei frechdanau, penderfynodd Will lansio brand annibynnol newydd.
Estynnodd Will at Ganolfan Diwydiant Bwyd ZERO2FIVE ym Mhrifysgol Metropolitan Caerdydd am gymorth technegol wedi’i ariannu drwy Raglen HELIX Llywodraeth Cymru i helpu i droi ei syniadau’n realiti.
Yn gyntaf, mynychodd Will un o sesiynau cychwyn rheolaidd ZERO2FIVE a chyfres o weithdai datblygu cynnyrch newydd ar bynciau allweddol gan gynnwys ysgrifennu briff cynnyrch, gwerthusiad synhwyraidd a datblygu cynnyrch diogel. Yna helpodd prosiect dadansoddi’r farchnad Picklebits i bennu nodweddion cynnyrch allweddol, gan gynnwys a ddylai eu piclau fod yn oer neu’n dymheredd ystafell a sut i’w lleoli mewn perthynas â’u cystadleuwyr.
Yna cefnogodd ZERO2FIVE y cwmni i ddatblygu cynllun rheoli diogelwch bwyd HACCP pwrpasol ar gyfer cynhyrchu eu picls. Mynychodd Will ddau weithdy hanner diwrnod HACCP a derbyniodd gymorth mentora un-i-un a oedd yn cwmpasu labelu cyfreithiol a dehongli canlyniadau profion microbiolegol.
O ganlyniad i’r gefnogaeth, sicrhaodd Picklebits sgôr hylendid bwyd o bump gan Iechyd yr Amgylchedd a lansiodd y cwmni ystod o dri phicl organig yn llwyddiannus, sy’n cynnwys gherkins wedi’u torri a betys balsamig. Bydd picklebits ar gael i’w prynu yn Ffair Nadolig Sain Dunwyd a Marchnad Nadolig Caerdydd ym mis Rhagfyr ac yn uniongyrchol o wefan y cwmni.
Dywedodd Will York, Perchennog Picklebits:
“Mae gwneud cynnyrch manwerthu fel picls yn wahanol iawn i’m busnes bwyd stryd blaenorol, ond arweiniodd ZERO2FIVE i drwyddo gyda llawer o gefnogaeth. Roedd eu holl gyrsiau hyfforddi yn llawn gwybodeth wych ac roedd y mentora un-i-un yn fy helpu i fynd i’r afael â’r ystyriaethau diogelwch bwyd angenrheidiol. Byddwn yn annog unrhyw fusnes newydd o Gymru i gysylltu â nhw a darganfod mwy am y cymorth a ariennir sydd ar gael.”
Meddai’r Athro Peter Sykes, Pennaeth Canolfan y Diwydiant Bwyd ZERO2FIVE:
“O fusnesau newydd bach i gwmnïau mawr sefydledig, mae Rhaglen HELIX yn darparu ystod o gymorth technegol a all helpu i adeiladu busnesau bwyd mwy arloesol, gwydn a llwyddiannus. Mae’n wych gweld sut mae’r gefnogaeth rydyn ni wedi’i ddarparu wedi helpu busnes newydd yng Nghymru i gymryd ei gamau cyntaf tuag at lwyddiant.”
Mae Rhaglen HELIX yn cael ei chyflwyno gan bedwar sefydliad ledled Cymru ac mae’n darparu ystod o gymorth technegol ac arloesi wedi’i ariannu i gwmnïau bwyd a diod Cymru.
