Mae Dr Ellen Evans, Darllenydd mewn Ymddygiad Diogelwch Bwyd yng Nghanolfan Diwydiant Bwyd ZERO2FIVE Prifysgol Metropolitan Caerdydd, wedi’i phenodi’n aelod cyfadran cwrteisi ar Raglen Maeth Dynol Prifysgol Talaith Ohio yn yr Adran Gwyddorau Dynol.
Mae’r penodiad yn cydnabod cyfraniad Ellen at ymchwil diogelwch bwyd cydweithredol a mentora myfyrwyr yn y brifysgol.
Ers 2017, mae Ellen wedi cydweithio’n helaeth ag academyddion ym Mhrifysgol Talaith Ohio ar ymchwil diogelwch bwyd sy’n ymwneud â hyfforddi dietegwyr, ymyriadau ar gyfer cleifion oncoleg sy’n cael triniaeth cemotherapi, a’r goblygiadau diogelwch bwyd sy’n gysylltiedig â blychau pecynnau bwyd. Fel rhan o’r cydweithrediad, mae Ellen hefyd wedi arwain adolygiad a ariannwyd gan Safonau Bwyd yr Alban o’r diffiniad o ‘grwpiau sy’n agored i niwed yn glinigol’ yn yr Alban i sicrhau bod cyngor diogelwch bwyd yn briodol.
I gydnabod y cydweithio rhwng Met Caerdydd a Phrifysgol Talaith Ohio, llofnodwyd Memorandwm Cyd-ddealltwriaeth rhwng y ddwy brifysgol yn 2022.
Bydd penodiad Ellen yn cryfhau’r berthynas ymhellach, gan ei galluogi i barhau i fentora myfyrwyr ym Mhrifysgol Talaith Ohio a blaenoriaethu cydweithrediadau ymchwil diogelwch bwyd yn y dyfodol.
Dywedodd Dr Sanja Ilic, Athro Cyswllt Maeth Dynol, Prifysgol Talaith Ohio:
“Mae Ellen eisoes wedi cael effaith fawr trwy’r ymchwil gydweithredol sydd wedi’i wneud gan Brifysgol Met Caerdydd a Phrifysgol Talaith Ohio ers 2017. Bydd ffurfioli ei rôl yn ein hadran yn ein galluogi i ddatblygu’r cydweithio hwn ymhellach fyth dros y blynyddoedd i ddod.”
Wrth siarad am y penodiad, dywedodd Ellen:
“Mae’n wych cael fy nghydnabod am y cyfraniad yr wyf wedi’i wneud i ymchwil yn Adran Gwyddorau Dynol Prifysgol Talaith Ohio. O ganlyniad i’m penodiad, byddwn yn gallu cynnal ymchwil gydweithredol bellach a fydd yn helpu i amddiffyn pobl ledled y byd rhag y risg o salwch a gludir gan fwyd.”
