Mae’r Athro Peter Sykes wedi’i gyhoeddi fel Pennaeth newydd Canolfan y Diwydiant Bwyd ZERO2FIVE yn dilyn penderfyniad yr Athro David Lloyd i drosglwyddo i ymddeoliad hyblyg.
Mae gan yr Athro Peter Sykes 30 mlynedd o brofiad o gydweithio â diwydiant, roedd gynt yn Ddeon Cyswllt (Menter ac Arloesi) a Chyfarwyddwr y Ganolfan Iechyd Diogelwch a’r Amgylchedd ym Mhrifysgol Metropolitan Caerdydd.
Bydd yr Athro David Lloyd yn aros gyda ZERO2FIVE yn rhan-amser, gan ei alluogi i drosglwyddo i ymddeol wrth barhau i gymryd rhan weithgar mewn prosiectau allweddol a rhannu ei arbenigedd. Bydd Peter yn gweithio ochr yn ochr â David yn ystod y cyfnod hwn, gan sicrhau parhad a throsglwyddiad llyfn i staff, partneriaid a rhanddeiliaid ZERO2FIVE.
Yn ystod ei ddeiliadaeth, mae’r Athro Lloyd wedi bod yn allweddol wrth sefydlu ZERO2FIVE fel canolfan flaenllaw ar gyfer arloesi bwyd, ymchwil a chydweithredu yn y diwydiant. O dan ei arweinyddiaeth, mae’r Ganolfan wedi ennyn enw da yn genedlaethol ac yn rhyngwladol, gan gefnogi busnesau bwyd a diod i arloesi, gwella ansawdd a diogelwch a gyrru cynaliadwyedd.
Mae datblygiad rhaglenni trosglwyddo gwybodaeth arloesol yr Athro Lloyd, gan gynnwys Rhaglen HELIX Llywodraeth Cymru, wedi cefnogi twf y sector bwyd yng Nghymru dros y degawd diwethaf.
Wrth siarad am y pontio, dywedodd yr Athro David Lloyd: “Mae wedi bod yn fraint arwain ZERO2FIVE a gweithio gyda thîm mor ymroddedig o arbenigwyr bwyd a phartneriaid diwydiant rhagorol. Rwy’n falch iawn y bydd y trefniant hyblyg hwn yn caniatáu imi barhau i gyfrannu wrth gefnogi’r cam nesaf o arweinyddiaeth i’r Ganolfan.”
Ychwanegodd: “Mae cefndir Peter mewn iechyd amgylcheddol, a oedd yn cynnwys archwiliadau o safleoedd bwyd a’i wybodaeth helaeth o reoli gwastraff bwyd, yn ei wneud yn berson delfrydol i lenwi’r rôl. Bydd ei brofiad o reoli unedau ymchwil a menter ym Mhrifysgol Metropolitan Caerdydd hefyd o fudd mawr i ZERO2FIVE a’i staff. Rwy’n gyffrous i weithio gyda Peter yn y misoedd nesaf i gefnogi’r trawsnewidiad llyfn o reoli’r Ganolfan i gyfnod newydd.”
Wrth siarad am ei benodiad, dywedodd yr Athro Peter Sykes: “Rwy’n falch iawn o gael fy mhenodi’n Bennaeth Canolfan y Diwydiant Bwyd ZERO2FIVE, sefydliad sy’n darparu cymorth hanfodol i ddiwydiant gweithgynhyrchu bwyd a diod yng Nghymru.
“Mae gweledigaeth ac arweinyddiaeth yr Athro Lloyd wedi bod yn ganolog i lwyddiant ZERO2FIVE dros y 28 mlynedd diwethaf. Un o’m tasgau cyntaf yw sicrhau llwyddiant parhaus Rhaglen HELIX tra hefyd yn archwilio cyfleoedd ar gyfer sut y gallwn gefnogi sector bwyd a diod Cymru yn y dyfodol.”
