Mae Canolfan Diwydiant Bwyd ZERO2FIVE ym Mhrifysgol Metropolitan Caerdydd wedi ehangu ei gwasanaethau profi blas ac arogl ar ôl penodi’r fferyllydd dadansoddol, Matt Bates.
Mae Matt yn arbenigo mewn samplu a dadansoddi cyfansoddion organig anweddol (COA), y cyfansoddion cemegol sy’n gyfrifol am yr aroglau a’r blasau rydyn ni’n eu hadnabod yn ein bwyd, ein diodydd a’n persawrau.
Mae’r gwasanaethau dadansoddol gwell hyn, sydd fel arfer ar gael i fusnesau bwyd rhyngwladol mawr yn unig, bellach ar gael i BBaCh o Gymru drwy gyfrwng project HELIX a ariennir gan Lywodraeth Cymru.
Mae gan Ganolfan Diwydiant Bwyd ZERO2FIVE ganolfan asesu synhwyraidd sydd wedi hen ymsefydlu, lle gall cwmnïau brofi cynhyrchion gyda phanel synhwyraidd o ddefnyddwyr. Mae penodi Matt, a buddsoddi’n ychwanegol mewn offer dadansoddol, yn ychwanegu dimensiwn newydd at y galluoedd profi, gan alluogi cwmnïau i adnabod cyfansoddion neu nodweddion penodol sy’n bresennol mewn cynhwysion a chynhyrchion terfynol sy’n cyfateb i flasau ac aroglau penodol.
Astudiodd Matt am radd Meistr mewn Cemeg a Ffrangeg ym Mhrifysgol Manceinion cyn gweithio i Lywodraeth Ffrainc yn datblygu systemau monitro ar gyfer dod i gysylltiad â thocsinau anweddol dan do ac yn yr awyr agored. Ers hynny, mae ei yrfa wedi’i arwain dros y byd i gyd, wrth weithio ar brosiectau mor amrywiol â monitro COA niweidiol o amgylch Adeilad y Cenhedloedd Unedig ar gyfer Adran Dân Efrog Newydd; nodi arogleuon drwg mewn gweithfeydd trin dŵr yn y Dwyrain Pell; datblygu technegau canfod i ddod o hyd i oroeswyr sy’n sownd mewn adeiladau sydd wedi dymchwel; ac yn agosach at adref, nodi cyfansoddion sy’n arwydd o oes silff wedi’u cwtogi mewn ffrwythau a llysiau wedi’u pecynnu sy’n barod i’w bwyta (RTE).
Mae Matt yn frwd dros bopeth yn ymwneud â phersawrau ac aroglau, ac fe sefydlodd ei fusnes ei hun yn 2014 yn gweithio gydag amrywiaeth o gwmnïau o’r radd flaenaf i ymchwilio i COA mewn cynhyrchion defnyddwyr yn ogystal ag yn ehangach wrth ddatblygu dulliau a monitro amgylcheddol.
Wrth sôn am ei benodiad, dywedodd Matt:
“Mae’r gwasanaeth gwell hwn yn rhoi mynediad i fusnesau BBaCh cymwys yma yng Nghymru at lefel o ddadansoddi COA sydd fel arfer wedi’i neilltuo i gwmnïau sy’n gallu buddsoddi’n sylweddol yn y math hwn o ymchwil.
“Mae hon yn dechnoleg ddadansoddol bwerus. Er enghraifft, rydym eisoes wedi gallu helpu cynhyrchydd cig lleol i ddangos bod modd canfod y math o borfa y mae anifeiliaid yn pori arno ym mhroffil blas y cynnyrch gorffenedig” meddai.
Un o’r prosiectau sydd newydd ei gwblhau gan dîm ZERO2FIVE yw un gyda busnes diodydd o Sir Fynwy, Old Coach House Distillery Ltd. Maen nhw’n cynhyrchu STILLERS, casgliad o ddiodydd botanegol wedi’u distyllu a wnaed â llaw, sy’n ddi-alcohol ac wedi’u hysbrydoli gan jin.
Mae’r defnydd o gynhwysion naturiol yn y broses ddistyllu draddodiadol yn ganolog i’r brand. Gan weithio gyda ZERO2FIVE, llwyddodd tîm yr Old Coach House i gadarnhau presenoldeb y blasau ac aroglau botanegol naturiol i gyd yn y cynnyrch gorffenedig, drwy brofi gyda phanel o ddefnyddwyr dynol a chynnal dadansoddiad cemegol a chromatograffig.
Dywedodd Dr David O’Brien, sylfaenydd yr Old Coach House Distillery:
“Mae hyn yn fantais enfawr i ni wrth i ni farchnata ein brand newydd. Mae tarddiad, cynhwysion naturiol i gyd a rhinweddau cynaliadwyedd yn elfennau allweddol i STILLERS. Gallwn ddangos yn bendant, pan ddywedwn ein bod yn cynhyrchu diod sydd â chynhwysion botanegol naturiol i gyd, y gellir adnabod y blasau hynny’n glir yn y ddiod orffenedig.
“Mae panel synhwyraidd o ddefnyddwyr bob amser yn ddefnyddiol i gael adborth ar hoffterau a chanfyddiadau cwsmeriaid, ond mae ychwanegu’r lefel hon o ddadansoddi cemegol ar ben hynny yn rhoi hyder gwirioneddol i ni sôn am gymhlethdod botanegol ein casgliad,” meddai.
Mae Canolfan Diwydiant Bwyd ZERO2FIVE yn cynnig mynediad i fusnesau bwyd a diod o Gymru at wasanaethau dadansoddi, datblygu cynnyrch newydd, cymorth ag ardystiad ac achrediad ac amrywiaeth o hyfforddiant drwy Broject HELIX, a ariennir gan Lywodraeth Cymru.
