Mae Uned Ymchwil Bwyd a Diod Canolfan y Diwydiant Bwyd ZERO2FIVE ar flaen y gad yn ei maes gydag arbenigedd mewn ymchwil sy’n canolbwyntio ar y diwydiant bwyd a diod, ymchwil diogelwch bwyd defnyddwyr yn y lleoliad domestig ac ymchwil gofal iechyd sy’n gysylltiedig â diogelwch bwyd. Mae gwreiddiau’r Uned mewn dros ugain mlynedd o weithgarwch ymchwil amlddisgyblaethol gan ymchwilwyr blaenllaw ac mae’n cymryd rhan yn rheolaidd mewn cydweithrediadau cenedlaethol a rhyngwladol.
Mae’r Uned Ymchwil Bwyd a Diod yn cyflwyno eu hymchwil yn flynyddol yn y cynadleddau diogelwch bwyd rhyngwladol mawr: y Gymdeithas Ryngwladol ar gyfer Diogelu Bwyd (IAFP) a Symposiwm Ewropeaidd yr IAFP ar Ddiogelwch Bwyd. Yn ogystal, fel aelodau o Gymdeithas Diogelu Bwyd y DU (UKAFP), mae aelodau o’r tîm ymchwil yn trefnu ac yn cynnal Cynhadledd UKAFP bob blwyddyn.
I gael rhagor o wybodaeth am yr Uned Ymchwil Bwyd a Diod ZERO2FIVE ac i weld ei chyhoeddiadau diweddaraf, cyfraniadau cynhadledd a newyddion, ewch i Borwr Ymchwil Prifysgol Metropolitan Caerdydd.
Tîm yr Uned Ymchwil
Ymchwil sy’n canolbwyntio ar y diwydiant bwyd a diod
O ystyried y cysylltiadau sydd gan ZERO2FIVE â’r diwydiant bwyd yng Nghymru, mae’r grŵp ymchwil yn aml yn cynnal prosiectau ymchwil gyda busnesau cynhyrchu a phrosesu bwyd a diod Cymru mewn perthynas â gwahanol feysydd diogelwch bwyd. Mae prosiectau diweddar a chyfredol wedi canolbwyntio ar: nodi’r rhwystrau i sicrhau a chynnal cydymffurfiaeth cynlluniau diogelwch bwyd; lleihau gwastraff; egwyddorion gweithgynhyrchu darbodus; profiadau diwydiant sy’n ymwneud ag ailfformiwleiddio cynnyrch bwyd ac asesu cydymffurfiaeth triniwr bwyd â phrotocolau hylendid dwylo.
Ymchwil diogelwch bwyd defnyddwyr yn y lleoliad domestig
Mae gan y grŵp ymchwil hanes hir o gynnal ymchwil diogelwch bwyd defnyddwyr ac maent yn cael eu cydnabod yn rhyngwladol am gyfraniadau i’r maes hwn. Mae hyn yn rhannol oherwydd y cyfleusterau ymchwil arloesol sydd wedi’u lleoli o fewn ZERO2FIVE, megis y gegin ymchwil defnyddwyr, sy’n caniatáu arsylwi digidol anymwthiol ar ymddygiad diogelwch bwyd. Mae prosiectau arsylwadol wedi canolbwyntio ar arferion trin a storio bwyd domestig oedolion hŷn sy’n gysylltiedig â’r risg o listeriosis; y ffactorau risg gwybyddol sy’n gysylltiedig â listeria monocytogenes ymhlith menywod beichiog; ynghyd ag agweddau ac ymddygiadau gofalwyr wrth baratoi a storio fformiwla powdwr babanod.
Ymchwil gofal iechyd sy’n gysylltiedig â diogelwch bwyd
Mae gan y grŵp ymchwil ddiddordeb mewn hyfforddi ac addysgu defnyddwyr, trinwyr bwyd a gweithwyr gofal iechyd proffesiynol. Defnyddiwyd damcaniaethau seicolegol i ddatblygu a darparu ymyriadau hyfforddiant ac addysgu wedi’u targedu.
Mae gweithgarwch ymchwil sy’n gysylltiedig â diogelwch bwyd sy’n canolbwyntio ar ofal iechyd yn ymgorffori hyfforddiant diogelwch bwyd gweithwyr gofal iechyd proffesiynol fel dietegwyr, darparu gwybodaeth diogelwch bwyd i gleifion a rhoddwyr gofal teuluol mewn lleoliadau gofal iechyd a chynhyrchu bwyd yn ddiogel a gwasanaeth bwyd yn ysbytai’r DU.
Cysylltwch â ni
Os hoffech gael gwybod mwy am sut y gallwn helpu eich busnes neu os oes gennych unrhyw gwestiynau am y cymorth y gallwn ei gynnig, yna cysylltwch â ni.
