Stori llwyddiant: Usk Valley Cheese Company
Cefndir
Wedi’i leoli yng Nghasnewydd, mae Usk Valley Cheese Company yn gynhyrchydd caws crefftus a sefydlwyd yn 2025. Mae’r cwmni yn crefftio cawsiau lled-galed sy’n dathlu hanes, blasau a thraddodiadau lleol Dyffryn Wysg.
Mewn cyfnod byr, mae’r cwmni wedi ennill Gwobr Aur yn y Categori Caws Newydd yng Ngwobrau Caws Prydain 2025 am eu caws, Six Peaks, sydd wedi’i drwytho â garlleg a pherlysiau cymysg.
Mae Usk Valley Cheese Company wedi gweithio gyda’r arbenigwyr caws yng Nghanolfan Bwyd Cymru i helpu i ddatblygu eu ryseitiau a chynhyrchu eu cynhyrchion ac maent bellach yn y broses o symud i’w cyfleuster cynhyrchu pwrpasol ei hunain.
Cysylltodd y cwmni â ZERO2FIVE pan oeddent yn edrych i ddatblygu ystod o fisgedi a bara yn ymgorffori eu caws y gellid eu gwerthu mewn gwyliau bwyd ochr yn ochr â’u cynhyrchion presennol.
Cefnogaeth gan ZERO2FIVE
Datblygodd tîm becws ZERO2FIVE amrywiaeth o wahanol fara, bisgedi a chraceri a gyflwynwyd yn ôl i’r cwmni i gasglu adborth a syniadau datblygu pellach.
Roedd y cynhyrchion a ddatblygwyd yn cynnwys craceri gwenith garlleg a chaws; ffyn bara caws; a bara soda corn a chaws.
Manteision y gefnogaeth
Mae gan Usk Valley Cheese Company bellach ystod o ryseitiau cynnyrch sy’n barod i’w datblygu ymhellach cyn eu lansio.
Er nad oes gan y cwmni eu cyfleuster becws eu hunain, mae ZERO2FIVE wedi eu rhoi mewn cysylltiad â gweithgynhyrchwyr posibl a allai gynhyrchu cynhyrchion ar eu rhan.
Dywedodd Ethan Parry, Cyfarwyddwr Usk Valley Cheese Company, “Mae gweithio gyda ZERO2FIVE wedi bod yn ased gwirioneddol i’n taith datblygu cynnyrch. Daeth eu tîm becws â’n gweledigaeth yn fyw gydag ystod wych o fara a chraceri wedi’u seilio ar gaws sy’n ategu i’n cawsiau arobryn yn berffaith. Mae’r gefnogaeth wedi rhoi nid yn unig ryseitiau newydd gwych inni eu datblygu ond hefyd cysylltiadau gwerthfawr â gweithgynhyrchwyr posibl. Wrth i ni barhau i dyfu, mae arbenigedd ac arweiniad ZERO2FIVE wedi bod yn amhrisiadwy.”
