Cwestiynau cyffredin

• Sut gall ZERO2FIVE gefnogi fy nghwmni? 

  Rydym yn cynnig ystod o gymorth technegol a masnachol sydd wedi’i deilwra i anghenion eich cwmni gan gynnwys cefnogaeth yn y meysydd canlynol: 

  Cymorth Technegol	Rheoli alergenau
  Paratoi archwiliad BRCGS a SALSA a dadansoddi bylchau	Ail fformiwleiddio / ail-beiriannu cynnyrch
  Dilysu (coginio, oeri, storio a dosbarthu)	Technoleg pecynnu
  Dylunio ffatrïoedd	Mynediad i gyfleusterau ac offer
  Datblygu Cynnyrch Newydd	Diogelwch cynnyrch microbiolegol: cefnogaeth gyda phenderfyniad oes silff a dehongli canlyniadau labordy
  Gwella prosesau	Rheoli Listeria
  Diwylliant diogelwch bwyd	Hyfforddiant (pwrpasol)
  Rheoli argyfwng – galw cynnyrch yn ôl	Cymorth Masnachol a Marchnata
  Adolygiad HACCP	Archwiliad ‘touchpoints’ defnyddwyr
  Dilysiad HACCP	Archwiliad cyfathrebu
  Archwilio mewnol	Grwpiau ffocws
  Adolygiad labelu	Mewnwelediad i’r farchnad ac i ddefnyddwyr
  Gwerthuso cynnyrch: dadansoddiad synhwyraidd a gwead	Strategaeth Marchnata
  Cyfrifiad maethegol	Ymgysylltu â’r diwydiant
  Adolygiad system rheoli ansawdd	Dadansoddiad categori
  Dehongli deddfwriaeth bwyd	Efelychu amgylchedd manwerthu ac astudiaethau tracio llygaid
  Lleihau / adolygu gwastraff

• A yw fy musnes yn gymwys ar gyfer cymorth a ariennir gan Project HELIX?

  Byddwn yn adolygu cymhwysedd cwmnïau a phrosiectau gyda chi’n unigol i wirio a ellir defnyddio cyllid Project HELIX i gefnogi’ch ymholiad. Mae rhai o’r meini prawf cymhwysedd allweddol yn cynnwys:  

  • Rhaid i chi fod yn wneuthurwr bwyd neu ddiod (neu’n bwriadu cychwyn busnes cynhyrchu bwyd neu ddiod) yng Nghymru.  
  • Mae’n rhaid i’r busnes fod o fewn ei derfynau rheoli cymorthdaliadau Cymorth Ariannol Lleiaf (MFA) o £315,000 yn y flwyddyn ariannol gyfredol a dwy flynedd ariannol flaenorol (1 Ebrill i 31 Mawrth).​

  Efallai y bydd ZERO2FIVE yn gallu cefnogi’r ymholiadau canlynol ar sail fasnachol lle na ellir defnyddio cyllid Project HELIX:  

  • Busnesau y tu allan i Gymru   
  • Busnesau arlwyo bwyd neu fanwerthu bwyd

• Sut ydw i’n cael cefnogaeth Project HELIX ar gyfer fy musnes?

  Yn gyntaf, cysylltwch â ni gyda’ch ymholiad i gael trafodaeth gychwynnol. Byddwn yn mynd trwy ein gwaith papur cymhwysedd gyda chi a bydd un o’n tîm yn trafod eich ymholiad prosiect gyda chi’n unigol er mwyn amlinellu’r prosiect, pennu lefel y gefnogaeth a ariennir a’r amserlen debygol ar gyfer darparu cefnogaeth. Unwaith y bydd holl ddogfennau contract cyllido Project HELIX wedi’u cytuno a’u llofnodi, gall y prosiect ddechrau.

• Faint fydd cost cefnogaeth Project HELIX?

  Os yw eich busnes yn cwrdd â’r meini prawf cymhwysedd ac wedi’i nodi fel micro-fusnes yna efallai y byddwch yn gymwys i gael cymorth wedi’i ariannu’n llawn. Gall busnesau bach, canolig a mawr cymwys dderbyn cefnogaeth rannol neu wedi’i hariannu’n llawn yn dibynnu ar lefel y cymorth sydd ei angen.  ​

• A allwch chi helpu fy musnes i sicrhau ardystiadau fel SALSA?

  Gallwn, gall Canolfan y Diwydiant Bwyd ZERO2FIVE gefnogi a mentora pob agwedd ar sicrhau ardystiad BRCGS a SALSA.  

  Mae gan ein tîm technegol gyfoeth o brofiad yn y diwydiant mewn perthynas â systemau rheoli diogelwch bwyd. Gall ZERO2FIVE hefyd gefnogi busnes trwy gynnal cyn-archwiliad manwl neu ddadansoddiad bwlch ar gyfer safon diogelwch bwyd o’ch dewis chi.  

  Cliciwch yma am fwy o wybodaeth.

• A fydd fy nghwmni'n cael arian Project HELIX yn uniongyrchol?

  Na, darperir y gefnogaeth ariannol trwy amser staff a chostau prosiect ZERO2FIVE cysylltiedig gan gynnwys mynediad i’n hoffer a’n cyfleusterau.

• A yw ZERO2FIVE yn cynnig profion microbiolegol a phrofion oes silff?

  Yn anffodus nid yw cyfleusterau labordy Prifysgol Metropolitan Caerdydd wedi’u hachredu gan UKAS gan eu bod yn cael eu defnyddio’n bennaf at ddibenion academaidd ac ymchwil; felly nid ydym yn cynnal unrhyw brofion oes silff na microbiolegol. Fodd bynnag, gallwn eich cyfeirio tuag at UKAS a’u rhestr o labordai achrededig, eich helpu i bennu meini prawf profi tebygol i gefnogi anghenion eich cynnyrch, a dehongli’ch canlyniadau ar ôl eu derbyn o labordy ardystiedig UKAS o’ch dewis.

• A yw ZERO2FIVE yn cynnal dadansoddiadau maethegol?

  Yn anffodus nid yw cyfleusterau labordy Prifysgol Metropolitan Caerdydd wedi’u hachredu gan UKAS gan eu bod yn cael eu defnyddio’n bennaf at ddibenion academaidd ac ymchwil. O ganlyniad, nid ydym yn cynnal dadansoddiadau maethegol arferol yn ein labordai ymchwil ac addysgu. Fodd bynnag, gallwn eich cyfeirio at labordai achrededig UKAS a all gynnal dadansoddiad maethegol, a’ch helpu i ddehongli’ch canlyniadau ar ôl eu derbyn.

  Mae gennym fynediad at feddalwedd cyfrifo maeth y gellir ei ddefnyddio i roi syniad o gyfansoddiad maethegol eich cynnyrch yn seiliedig ar y rysáit a gwybodaeth am golledion coginio a gyflenwir gan eich busnes.

• A all ZERO2FIVE ysgrifennu cynllun HACCP ar gyfer fy nghwmni?

  Mae astudiaeth HACCP sydd wedi’i hystyried a’i dogfennu’n ofalus yn hanfodol ar gyfer unrhyw fusnes bwyd a diod ac mae gweithdrefnau HACCP sy’n seiliedig ar egwyddorion Codex yn ofyniad cyfreithiol ledled yr UE. Er y gall y tîm yn ZERO2FIVE eich cefnogi trwy’r broses o ddatblygu astudiaeth HACCP yn seiliedig ar ganllawiau arfer gorau, ni allwn ysgrifennu eich astudiaeth HACCP ar eich rhan. Perchnogion y busnes sy’n gyfrifol am ddiogelwch bwyd a chydymffurfiad cyfreithiol yr holl gynhyrchion a gynhyrchir gan y busnes.  

  Gallwn adolygu eich cynllun a’ch cefnogaeth HACCP gyda throsglwyddo gwybodaeth neu fentora mewn unrhyw feysydd y gallai eich busnes fod angen cefnogaeth. Mae yna becynnau cyfrifiadur hefyd ar gael i helpu gydag ysgrifennu cynllun HACCP fel MyHACCP ar gyfer busnesau bwyd a diod cychwynnol a llai.

• A yw ZERO2FIVE yn calibradu pwysau a chloriannau?

  Na, cysylltwch ag adran safonau masnach eich awdurdod lleol a fydd yn gallu eich helpu gyda hyn. Fodd bynnag, gallwn eich cefnogi gyda gweithdrefnau calibradu a dogfennaeth ategol eich cwmni. 

• A yw ZERO2FIVE yn dylunio labeli?

  Efallai y bydd cefnogaeth ar gyfer adolygu a datblygu cynnwys labeli bwyd a diod ar y cyd â deddfwriaeth gyfredol y DU a’r UE ar gael i fusnesau cymwys o dan gyllid Project HELIX.  

  Ar hyn o bryd nid ydym yn cynnig cefnogaeth dylunio gwaith celf. Efallai y bydd cefnogaeth dylunio label a brandio ar gael i’ch busnes os ydych chi’n gymwys trwy gyllid amgen. Cysylltwch â Cywain i drafod eich anghenion dylunio ymhellach.

• A all fy nghwmni ddefnyddio'r cyfleusterau yn ZERO2FIVE i gynhyrchu cynhyrchion?

  Ni allwn logi ein cyfleusterau cynhyrchu bwyd a diod at ddibenion cynhyrchu masnachol ar hyn o bryd oherwydd bod y prif ddefnydd o’n mannau cynhyrchu bwyd yn canolbwyntio yn canolbwyntio ar waith academaidd ac ymchwil. Fodd bynnag, gellir defnyddio ein mannau cynhyrchu a datblygu bwyd ar gyfer datblygu syniadau a threialon dichonoldeb cychwynnol ar raddfa fach. Mae gan ein partneriaid Arloesi Bwyd Cymru, Canolfan Fwyd Cymru yng Nghanolbarth Gorllewin Cymru a’r Ganolfan Technoleg Bwyd yng Ngogledd Cymru, ystod o gyfleusterau gweithgynhyrchu masnachol ac unedau deori pwrpasol – cysylltwch â nhw am fanylion y gefnogaeth y gallant ei chynnig naill ai trwy ddulliau wedi’u hariannu neu heb eu hariannu.

• Ydych chi'n darparu cyllid ar gyfer prynu offer neu gyfleusterau?

  Ar hyn o bryd dim ond ar gyfer trosglwyddo gwybodaeth y gellir defnyddio cyllid Prosiect HELIX ac nid yw’n cynnwys taliad cyllid uniongyrchol ar gyfer prynu cyfleusterau. Cysylltwch â Cywain neu Busnes Cymru a fydd efallai’n gallu eich cynghori ar ffrydiau cyllido perthnasol eraill ar gyfer gwariant cyfalaf ar adeiladau, peiriannau ac offer.

• A all ZERO2FIVE ysgrifennu cynllun busnes ar gyfer fy nghwmni?

  Er na allwn ysgrifennu cynllun busnes ar gyfer eich cwmni, gallwn helpu gydag ymchwil i’r farchnad a defnyddwyr i lywio’ch cynllun a’ch strategaeth fusnes.

• A all ZERO2FIVE ddylunio logo ar gyfer fy nghwmni?

  Ar hyn o bryd nid ydym yn cynnig cefnogaeth gyda dylunio logo ond efallai y gallwn ddarparu cefnogaeth gychwynnol gydag ystyriaethau ar gyfer datblygu brand. Gallwn hefyd gefnogi gydag asiantaethau briffio. Efallai y bydd cyllid trwy ffynonellau amgen Llywodraeth Cymru ar gael i fusnesau cymwys. Cysylltwch â Cywain  i gael mwy o fanylion. Gallwn hefyd gynnig grwpiau ffocws neu gyfweliadau un i un gyda’ch marchnad darged er mwyn helpu gyda phenderfyniadau dylunio brandio a / neu becynnu.

• A all ZERO2FIVE greu ryseitiau cynnyrch ar gyfer fy nghwmni?

  Efallai y bydd ZERO2FIVE yn cefnogi busnesau cymwys i ddatblygu ryseitiau cynnyrch pwrpasol. Fodd bynnag, mae’n rhaid bod gennych rysáit gychwynnol ar gyfer eich cynnyrch a briff cynnyrch wedi’i ddogfennu y gallwn ni eich helpu i’w ddatblygu ymhellach.  

• A oes marchnad ar gyfer fy nghynnyrch?

  Mae gennym fynediad at ddata marchnad a thueddiadau o  Kantar Worldpanel, The Food People a GlobalData a gallwn ddarparu mewnwelediadau a dadansoddiad i chi er mwyn eich helpu i wneud y penderfyniad hwn yn effeithiol.

• A all ZERO2FIVE siarad â chyflenwyr, prynwyr, labordai neu iechyd yr amgylchedd ar ran fy nghwmni?

  Na, dim ond gyda chi y gallwn ni gysylltu. Ond, gallwn eich mentora ar y cwestiynau cywir i’w gofyn i’r sefydliadau hyn. Mae’r holl wybodaeth a drafodir fel rhan o’ch prosiect yn gwbl gyfrinachol.

• A all ZERO2FIVE helpu gydag allforio?

  Gallwn helpu eich cwmni gyda gofynion technegol allforio a hefyd darparu data marchnad i chi ar gyfer nodi cyfleoedd tramor. Am gefnogaeth pellach, cysylltwch â Busnes Cymru.

• Beth mae ZERO2FIVE yn ei olygu?

  Dyma’r tymheredd diogel ar gyfer oergell. Rydym yn canolbwyntio ar ddiogelwch bwyd felly dyna pam rydyn ni’n cael ein galw’n ZERO2FIVE.

Cysylltwch â ni

Os hoffech gael gwybod mwy am sut y gallwn helpu eich busnes neu os oes gennych unrhyw gwestiynau am y cymorth y gallwn ei gynnig, yna cysylltwch â ni.

Cysylltwch â ni