Mae cwmni hufen iâ a phwdinau rhewedig o Sir Gaerfyrddin wedi sicrhau ardystiad diogelwch bwyd a gydnabyddir yn fyd-eang yn dilyn cymorth technegol a ddarparwyd drwy Raglen HELIX Llywodraeth Cymru, a elwid gynt yn Brosiect HELIX.
Mae Hufen Iâ Mario’s, a enwyd yn gynhyrchydd bwyd y flwyddyn yng Ngwobrau Bwyd a Diod Cymru 2024, wedi llwyddo i sicrhau ardystiad lefel Dechrau Canolradd BRCGS. Bydd yr ardystiad diogelwch bwyd hwn, sydd wedi’i gynllunio ar gyfer busnesau bach a chanolig, yn galluogi’r cwmni i dargedu ystod ehangach o gwsmeriaid sydd angen y safon.
Ar ôl ehangu i ail uned ffatri yn 2023, penderfynodd Mario’s ddechrau’r broses o sicrhau ardystiad lefel Dechrau Canolradd BRCGS i sbarduno twf busnes pellach. Fe wnaethon nhw gysylltu â Chanolfan Diwydiant Bwyd ZERO2FIVE ym Mhrifysgol Metropolitan Caerdydd ddechrau 2024 am gymorth technegol drwy Raglen HELIX a ariennir gan Lywodraeth Cymru.
I ddechrau, cynhaliodd ZERO2FIVE ddadansoddiad bylchau o systemau rheoli diogelwch bwyd Mario’s i nodi’r prosesau a’r gwaith papur yr oedd angen eu rhoi ar waith i gydymffurfio â Dechrau BRCGS. Yna rhoddwyd cynllun gweithredu ar waith i fentora tîm Mario’s i weithredu’r newidiadau gofynnol.
Cefnogodd ZERO2FIVE Mario’s i ddiweddaru ystod o weithdrefnau, gan gynnwys olrhain a galwadau yn ôl, asesiadau risg diogelwch safle, datblygu cynhyrchion newydd ac arferion gweithgynhyrchu da. Fel rhan o’r gefnogaeth, cynhaliodd ZERO2FIVE weithdy diwylliant diogelwch bwyd pwrpasol a mentora ar sut i ddatblygu cynllun diwylliant diogelwch bwyd.
Llwyddodd Mario’s i basio eu harchwiliad Dechrau Canolradd BRCGS ym mis Chwefror 2025 ac o ganlyniad i’r gefnogaeth, maent wedi diogelu 18 o swyddi o fewn y cwmni.
Dywedodd Riccardo Dallavalle, Cyfarwyddwr Gweithrediadau, Hufen Iâ Mario’s:
“Mae’r gefnogaeth gan ZERO2FIVE wedi bod yn hanfodol wrth alluogi Mario’s i sicrhau ardystiad Dechrau BRCGS ac o ganlyniad i hynny ysgogi twf busnes pellach. Rydym yn gobeithio cymryd y cam nesaf tuag at Safon Fyd-eang lawn BRCGS yn ystod y blynyddoedd nesaf a gyda sylfeini cadarn o lefel Dechrau Ganolradd BRCGS yn eu lle, rydym ar ein ffordd yn dda.”
Dywedodd yr Athro David Lloyd, Cyfarwyddwr Canolfan Diwydiant Bwyd ZERO2FIVE:
“Mae ardystiad diogelwch bwyd trydydd parti fel BRCGS a SALSA yn ofyniad i weithgynhyrchwyr ennill busnes newydd gyda llawer o fanwerthwyr, cyfanwerthwyr a chwmnïau gwasanaeth bwyd cenedlaethol. Os yw eich cwmni’n awyddus i sicrhau un o’r safonau hyn, cysylltwch â ni yn ZERO2FIVE i drafod y gefnogaeth a ariennir gan Lywodraeth Cymru a allai fod ar gael.”
Mae Rhaglen HELIX yn cael ei chyflwyno gan bedwar sefydliad ledled Cymru ac mae’n darparu ystod o gymorth technegol ac arloesi wedi’i ariannu i gwmnïau bwyd a diod Cymru.
