Mae gwneuthurwr bwyd a diod o Blackwood wedi uwchsgilio recriwt newydd i’w tîm technegol diolch i gefnogaeth fentora a ariennir gan brosiect Llywodraeth Cymru.
Derbyniodd ANR-Probake, sy’n wneuthurwr blaenllaw o nwyddau wedi’u pobi yn llawn maeth, gefnogaeth gan Ganolfan Diwydiant Bwyd ZERO2FIVE ym Mhrifysgol Metropolitan Caerdydd drwy Raglen HELIX Llywodraeth Cymru.
Cysylltodd y cwmni â ZERO2FIVE i gydweithio pan oeddent yn chwilio am gefnogaeth gyda mentora Courtney Scott, cynorthwyydd technegol a oedd newydd gael ei dyrchafu o rôl sicrhau ansawdd. Er nad oedd ganddi gefndir ffurfiol mewn technoleg bwyd, roedd Courtney wedi cael ei hadnabod fel unigolyn â photensial uchel o fewn ANR-Probake ac wedi dangos dyhead i ddilyn gyrfa o fewn yr adran dechnegol.
Darparodd technolegydd ZERO2FIVE fentora un-i-un a oedd yn canolbwyntio ar adeiladu gwybodaeth Courtney mewn meysydd blaenoriaeth ar gyfer y cwmni, gan gynnwys Safon Diogelwch Bwyd Byd-eang BRCGS, cymeradwyo cyflenwyr, manylebau, a graddnodi offer. Fe wnaeth y gefnogaeth uwchsgilio’r cynorthwyydd technegol yn gyflym ac yn effeithiol, gan ei galluogi i ysgwyddo cyfrifoldebau ychwanegol o fewn y tîm technegol.
Mynychodd Courtney hefyd gyfres o weithdai diogelwch bwyd mewnol ZERO2FIVE ar bynciau gan gynnwys asesu risg a manylebau deunyddiau crai, tra bod ANR-Probake wedi derbyn rhagor o gefnogaeth i’w helpu i gael gwell dealltwriaeth o’r gwastraff a gynhyrchir yn ystod eu prosesau cynhyrchu.
Dywedodd Sabina Jones, Rheolwr Technegol, ANR-Probake:
“Mae’r gefnogaeth a ddarparwyd gan ZERO2FIVE wedi bod yn amhrisiadwy, nid yn unig i dwf proffesiynol Courtney ond hefyd i’n sefydliad. Mae wedi bod yn hynod werthfawr gweld gwybodaeth a hyder cynyddol Courtney, sydd wedi ei galluogi i ysgwyddo cyfrifoldebau ychwanegol. Mae hyn, yn ei dro, wedi caniatáu i mi, fel rheolwr technegol, neilltuo mwy o amser i flaenoriaethau busnes ehangach. Byddwn i’n argymell ZERO2FIVE yn fawr iawn i unrhyw fusnes bwyd yng Nghymru sy’n chwilio am gymorth arbenigol.”
Dywedodd yr Athro David Lloyd, Cyfarwyddwr Canolfan Diwydiant Bwyd ZERO2FIVE:
“Mae’r hyfforddiant technegol rydym yn ei ddarparu drwy Raglen HELIX yn hanfodol wrth helpu i greu gweithlu medrus a all ddiwallu anghenion y diwydiant bwyd a diod yng Nghymru. O fentora un-i-un i weithdai grŵp, rydym yn eich annog i gysylltu â ni i drafod eich gofynion hyfforddi a’r gefnogaeth a ariennir a allai fod ar gael.”
Mae Rhaglen HELIX yn cael ei chyflwyno gan bedwar sefydliad ledled Cymru ac mae’n darparu ystod o gymorth technegol ac arloesi wedi’i ariannu i gwmnïau bwyd a diod Cymru.
